កូរ៉េខាងត្បូង៖ ប្រជាជនកូរ៉េខាងត្បូងចេញទៅបោះឆ្នោតជ្រើសរើសប្រធានាធិបតីថ្មីនៅថ្ងៃពុធនេះ ដោយមានបេក្ខជនគណបក្សកាន់អំណាចសេរីនិយម និងអតីតរដ្ឋអាជ្ញាអភិរក្សនិយមដែលចាត់ទុកថាការបោះឆ្នោតលើកនេះមានភាពតឹងតែង។

ការស្ទាបស្ទង់មតិមុនការបោះឆ្នោតបានបង្ហាញថាលោក Lee Jae-myung អតីតអភិបាលខេត្ត Gyeonggi ដែលមានប្រជាជនច្រើនបំផុតរបស់ប្រទេសកូរ៉េខាងត្បូង និងគូប្រជែងរបស់គាត់អតីតអគ្គរដ្ឋអាជ្ញា Yoon Suk Yeol មានភាគរយច្រើនជាងគេប្រៀបធៀបនឹងគូប្រជែង ១០នាក់ផ្សេងទៀត។ សម្រាប់ការបោះឆ្នោតនេះ អ្នកឈ្នះនឹងចូលកាន់តំណែងនៅខែឧសភា ដែលមានរយៈពេលប្រាំឆ្នាំ ក្នុងនាមជាមេដឹកនាំប្រទេសដែលមានសេដ្ឋកិច្ចជឿនលឿនលំដាប់ទី១០ របស់ពិភពលោក។

លោក Lee និង Yoonhave បានធ្វើយុទ្ធនាការនយោបាយប៉ះទង្គិចពាក្យសម្តីគ្នាច្រើន ប៉ុន្តែទោះបីយ៉ាងណាក៏ដោយថ្មីៗនេះ អ្នកទាំងពីរបានព្រមព្រៀងគ្នាថា ប្រសិនបើពួកគេឈ្នះ ពួកគេនឹងមិនធ្វើការស៊ើបអង្កេតដោយហេតុផលនយោបាយប្រឆាំងនឹងភាគីម្ខាងទៀតនោះទេ។ មនុស្សជាច្រើនជឿថាបេក្ខជនដែលចាញ់អាចនៅតែប្រឈមមុខនឹងការស៊ើបអង្កេតឧក្រិដ្ឋកម្មលើរឿងអាស្រូវមួយចំនួនដែលពួកគេជាប់ពាក់ព័ន្ធ។

អ្នករិះគន់និយាយថា បេក្ខជនទាំងពីរ នៅក្នុងយុទ្ធនាការណ៍បោះឆ្នោតមិនបានបង្ហាញពីយុទ្ធសាស្ត្រច្បាស់លាស់អំពីរបៀបដែលពួកគេនឹងបន្ធូរបន្ថយការគំរាមកំហែងពីកូរ៉េខាងជើង និងអាវុធនុយក្លេអ៊ែរនោះទេ។

ការបោះឆ្នោតនេះកើតឡើងខណៈដែលប្រទេសកូរ៉េខាងត្បូងកំពុងប្រឈមនឹងការកើនឡើងវិញដោយសារមេរោគកូវីដ-១៩។ កាលពីថ្ងៃពុធ អាជ្ញាធរសុខាភិបាលកូរ៉េខាងត្បូងបានរាយការណ៍ពីករណីឆ្លងមេរោគថ្មីចំនួន ៣៤២ ៤៤៦ ដែលជាកំណត់ត្រាខ្ពស់មួយទៀត។

បន្ទាប់ពីការបោះឆ្នោតបានចាប់ផ្តើមនៅម៉ោង ៦ព្រឹក អ្នកបោះឆ្នោតពាក់ម៉ាស់បានរង់ចាំជាជួរយ៉ាងយូរនៅតាមការិយាល័យបោះឆ្នោតមួយចំនួន ហើយសម្រាប់អ្នកឆ្លងមេរោគកូវីដ-១៩ ត្រូវទៅបោះឆ្នោតបន្ទាប់ពីការបោះឆ្នោតធម្មតាត្រូវបានបញ្ចប់នៅល្ងាចថ្ងៃពុធ។

ប្រជាជនកូរ៉េខាងត្បូងប្រហែល ៤៤លាននាក់ដែលមានអាយុ ១៨ឆ្នាំមានសិទ្ធិបោះឆ្នោតក្នុងចំណោមប្រជាជន ៥២លាននាក់របស់ប្រទេសនេះ នេះបើយោងតាមគេហទំព័ររបស់គណៈកម្មាធិការជាតិរៀបចំការបោះឆ្នោត៕